PRN13: PBB, parti komponen GPS nyikap diri napi proses demokrasi

MIRI, 27 Okt: Parti Pesaka Bumiputera Bersatu (PBB) begulai enggau parti komponen Gabungan Parti Sarawak (GPS) deka napi siti agi proses demokrasi ti beguna bendar beserimbai enggau Pengawa Bepilih Nengeri Sarawak Ke-13 (PRN13) tu ti deka meri awak ngagai rayat beratika pengulih administrasyen, polisi pemansang sereta kuing tuju pengidup jemah nengeri tu.

Kaban Parlimen Sibuti, Datuk Lukanisman Awang Sauni madahka, nya siti fasa ti beguna amat ngagai rayat Sarawak.

“Berindik ari parti tu udah lama mai pemaik sereta penegap politik Sarawak sereta nyendiaka pemansang ti meruan ungkup pengidup jemah nengeri, PBB begulai enggau GPS sentiasa seruran nyikap diri.

“Tebal agi, napi PRN sereta ngesan tangkup pengawa ti beguna bendar ba dalam administrasyen enggau pemansang nengeri enti nyema diberi mandat baru nengah proses bepilih nengeri,” ku iya madah.

Iya mansutka jaku nya nengah sebengkah penerang rasmi ba dalam laman Facebook kemari.

Lukanisman ke mega Sapit Menteri Luar nerangka, taja pia, sida endang nemu senentang pengandal rayat ukai siti pekara ke ulih dikumbai meruan enti nyema nadai pengeranding dipeda laban pekara tu mesti dikemujurka nengah pengawa, integriti sereta pengulih dikena nangkup aspirasyen rayat.

“Ba dalam aspek politik, sejarah meri kitai pemun, pemujur pengawa nempa pengandal, seraya visyen nentuka pengidup jemah,” tandu iya.

Ba penemu iya ke mega Sapit Tuai Raban Nembiak PBB, PRN13 tu siti peluang ke besai reti dikena mantaika aspirasyen rebak baru Sarawak.

“Raban nembiak maya diatu meda peluang kereja ti bekualiti, ekonomi ti lebih kompetitif, akses pelajar ti luas sereta pemansang ke inklusif entara kandang mengeri enggau menua pesisir,” ku iya madah agi.

Nya alai, iya andal amat GPS ngembuan resipi ke pemadu manah ari sukut pelasar enggau polisi ke deka nyendiaka jalai ke pemadu manah ungkup pengidup rayat Sarawak dudi hari. – TVS