Komuniti rumah panjai dilalau chakah ngemansangka produk dagang temuai

JULAU, 27 Okt: Komuniti lokal dilalau terus kreatif enggau chakah agi ngemansangka produk dagang temuai ti ulih matak ukai semina temuai menua tu aja, tang mega temuai antarabansa, nengah chara mantaika pengelebih budaya, adat enggau main asal komuniti rumah panjai.

Menteri Dagang Temuai, Seni enggau Budaya, Datuk Seri Tiong King Sing madahka, inisiatif baka nya endang patut dikemujurka, tebal agi pengudah nerima bantu enggau agih belanja ari perintah.

“Perintah enggau raban ke bekaul mega patut seruran mendingka buah penemu komuniti ba renggat baruh kelebih agi raban nembiak.

“Tuju tu dikena ngelala penemu enggau potensyel baru ti ulih dikemujurka ungkup pemansang komuniti. Tetiap buah penemu enggau buah runding patut diberi perati berat,” ku iya madah.

Iya mansutka jaku nya pengudah ngulu Pengerami Bejadika Projek Perengkaguna enggau Jalai Semin ba Rumah Panjai Margretta, Kerangan Buloh, empai lama.

Tiong ke mega Kaban Parlimen Bintulu nerangka, sektor dagang temuai ulih muka peluang ekonomi ngagai komuniti menua tu, lebih agi raban B40 enggau raban kurang penatai pemisi.

“Berindik enggau nya, aku meransang peranak nyendiaka perengkaguna ‘homestay’ dikena ngulihka penatai pemisi tambah,” terang iya.

Iya nyemetak nerangka, taja pia, aspek pemeresi, pengelantang enggau pengelikun mesti seruran diberi perati, nyengkaum pemeresi jamban, lantai, panggal enggau perengkaguna bukai dikena nentuka temuai ngembuan peneleba endur diau ke manah.

“Nengah kerejasama semua raban, aku andal amat pemansang infrastruktur enggau pengawa ngemansangka sektor dagang temuai ulih dikena penuh, seraya nyungkak ekonomi sereta ngangkatka pengelantang pendiau komuniti lokal,” tandu iya.

Iya madahka, pemansang infrastruktur di menua pesisir beguna amat dikena ngangkatka pengelantang enggau pemaik komuniti rumah panjai. – TVS