Jefferson nemuai ngagai Kompleks Pengintu Pengelantang Dalat

DALAT, 14 Okt: Sapit Menteri ba Opis Premier (Undang-undang enggau Adat Bumiputera), Datuk Jefferson Jamit Unyat bisi nguluka delegasyen nemuai rasmi ngagai Kompleks Pengintu Pengelantang Dalat ti digaga ngena kos penyampau RM12.5 juta.

Ku iya madah, tuju program nemuai kia laban deka meda fasiliti moden sereta operasyen palan pengintu pengelantang begulai ke bisi disediaka ba palan nya.

Jefferson ke mega Kaban Kunsil Nengeri (ADUN) Bukit Goram madahka, kompleks nya bisi disikap Palan Orang Lunggar Umur (PAWE), Palan Ngemanahka Ulah (PDK), Palan Sereba Intervensyen Tumu (OSEIC), Palan Komuniti Digital sereta perengkaguna rekreasyen baka balai mayuhguna sereta pegung endur nyemerai mini.

“Penemuai nya nyadi referen ti beguna amat dikena ngamatka perambu ngaga Kompleks Pengintu Pengelantang Kapit, ti deka meri pemaik rama enggau ekonomi ngagai komuniti ke mendam di pelilih nya,” ku iya madah nengah sebengkah penerang BA laman Facebook kemari.

Palan begulai nya mega deka ngemuntangka rayat Kapit ngulihka servis pengelantang pendiau, intervensyen tumu anak mit, nyaga orang lunggar umur, sereta negapka komuniti ti inklusif.

“Komitmen tu mandangka pengawa perintah Sarawak ti enda ngetu ngerembaika infrastruktur pengelantang inklusif ungkup pengelantang rayat,” terang iya.

Iya nyemetak nerangka, komitmen tu mandangka pengawa perintah sarawak ti enda ngetu ngerembaika infrastruktur pengelantang inklusif ungkup pengelantang rayat.

Bala pemesai bukai ke bisi datai iya nya Residen Kapit Elvis Didit, Pegawai Pelilih Kapit Thomas Geoffrey Kendawang, Penguasa Opis Tanah enggau Survei Kapit Diana binti kuwa, Pengari KPWK sereta Injinir Projek Opis Kereja Raya (JKR) Kapit.