DUN Sarawak: 680 sekula di Sarawak dikategorika kelalu repuk

KUCHING, 19 Okt: Bisi 680 buah sekula ba Sarawak dikategorika kelalu repuk tauka enda likun dikena, seraya begunaka mayuh belanja dikena ngemanah nukar perengkaguna baru.

Menteri Pelajar, Inovasyen enggau Pemansang Bakat Sarawak, Dato Roland Sagah Wee Inn madah, sekula nya skala 6 enggau 7 ti mandangka tikas udah balat enggau patut dikemanah lengkas.

“Nengah agih bayar panjar RM1 bilion, bisi 86 projek sekula repuk udah tembu digaga, ditangkan teda iya 54 projek benung digaga bemacham pengawa,” ku iya.

Iya mansutka pekara nya maya nyimpul jurai ungkup opis menteri iya nyerumba Aum Kunsil Nengeri (DUN) Sarawak ke-19, sehari tu tadi.

Sagah mega madah, nengah Projek Rayat, enam ari 12 projek udah dikelala udah tembu, ditangkan ke bukai agi ba renggat benung digaga.

Nya alai, iya meri terima kasih ngagai Perintah Besai laban nengah agih RM1.3 bilion udah mujur ngemanah 682 sekula repuk ba selampur menua lebih agi nyengkaum ba Sabah enggau Sarawak baka ke udah dipadah Menteri Besai maya mantai Bajet MADANI Kelima 2027 empai lama.

“Aku ngarap ari agih belanja tu ulih diberi terus dikena ngemanah infrastruktur enggau nukar perengkaguna sekula di Sarawak,” ku terang iya.-TVS